Հալոթերապիան բուժման մեթոդ է, որը հիմնված է շնչառական թերապիայի վրա` արհեստական աղային քարանձավներում ապահովվող կլիմայի շնորհիվ:

Աղի սենյակներում անցկացվող սեանսները երեխաների իմունային համակարգը ամրապնդող ամենաանվտանգ և արդյունավետ մեթոդներից է: Մագնեզիումի իոնների, կալցիումի, նատրիումի և բրոմի պարունակությունը օդում մաքրում է շնչառության օրգանները` բրոնխները, թոքերը, մանրէներից և բակտերիաներից` իր արդյունքներով լիովին փոխարինելով ծովային օդով թերապիան ծովափնյա հանգստավայրերում: Իսկ թթվածնով հագեցած արյունը աղային գոլորշիների ազդեցության տակ հանգստացնում է երեխայի նյարդային համակարգը: Հալոթերապիայի մի քանի սեանսներից հետո հարբուխով, խզզոցներով, հազի նոպաներով երեխաների վիճակը զգալիորեն բարելավվում է, ինչը արագացնում է ապաքինումը` առանց դեղորայք օգտագործելու:

Ժամանակակից աղի սենյակները ոչ միայն առաջարկում են ոչ ավանդական բուժման մեթոդ, այլև հանդիսանում են լավ ինքնազգացողության և բարձր տրամադրության աղբյուր:

Ըստ տարբեր փորձագիտական գնահատականների` թերապիայի արդյունավետությունը հասնում է 80-90%-ի: Իսկ մեթոդն էլ ամբողջովին անվնաս է և չունի կողմնակի ազդեցություն: Այն լավ համադրվում է այլ ֆիզիոթերապեվտիկ բուժման մեթոդների հետ և ունի ազդեցության լայն շրջանակ, որն ընդգրկում է հատկապես շնչառական և նյարդային համակարգերի հիվանդությունները:

Մեր ոգևորվածությունն անսահման է, քանի որ այս նախագիծը լսողության խնդիրներ ունեցող 120 երեխաներին հատուկ վերարտադրված միջավայրի շնորհիվ տվեց իմունիտետը, առողջությունը, ինքնազգացողությունը և տրամադրությունը բարելավելու հնարավորություն:

Ծրագրի նպատակը

Բարելավել համալիրի աշակերտների իմունիտետը և առողջությունը: Թողնել հանգստացնող ազդեցություն, օգնել հաղթահարել մշտական հոգնածությունը:

Ինչ է արվել

Մեր հիմնադրամը օգնեց ավարտին հասցնել «Աղային քարանձավ»` կարևոր և անհրաժեշտ ծրագիրը, որի սկիզբը դրել էին «Salzgrotte» աղային քարանձավների ցանցը և Armenian Charity Runners Team-ը:

Քարանձավանման սենյակը պատված է աղով, ունի աղը իոնացնող սարքավորում, գեղեցիկ դեկորատիվ լուծումներ, լուսավորություն, տաք հատակ, հեռուստացույց և տեսագրման սարքեր: